A toalla, o protector solar e un xogo en galego! Este verán, ademais de descansar, tamén podes xogar e divertirte na nosa lingua mentres pasas o día na praia.
Tanto se vas coa familia, con amizades ou en parella, aquí tes catro propostas en galego para todos os gustos e idades. Algunhas son para xogar desde o móbil e outras ocupan pouco espazo na mochila.
O xogo do Tabú
O clásico xogo de adiviñar palabras, agora en galego e de balde no móbil. Desde As chaves da lingua creamos este xogo para que poidás xogar directamente na ligazón, sen descargas nin rexistros. Unha persoa dá pistas sobre unha palabra oculta sen poder usar as palabras prohibidas que aparecen na pantalla.
Baralla Galega
Unha baralla con simboloxía galega para xogar aos clásicos de sempre: brisca, escoba, tute e moito máis. En vez dos paos tradicionais, os catro símbolos son a vieira, a cunca de viño, o fouciño e o pemento de Padrón. Compacta e fácil de meter na bolsa de praia.
Helendra
Un xogo de cartas, creado por Quimera Xogos, que te mergulla nun bosque máxico cheo de criaturas fantásticas. De 1 a 5 persoas, cada xogador ten un rol secreto e un obxectivo diferente. Para gañar, tes que rematar a túa quenda cumprindo a túa condición de vitoria sen que os demais o descubran.
Sopas de letras de Pido Papas
Para os momentos de máis calma, Pido Papas ofrece sopas de letras e escape rooms en galego con temáticas variadas e para todas as idades. Ideal para os máis pequenos ou para quen prefire algo tranquilo mentres escoita o mar.
E ti, que xogo levas na túa bolsa da praia? Deixa a túa recomendación nos comentarios! Seguro que hai propostas que aínda non coñecemos e que merecen estar nesta lista.
