O mes de marzo é un tempo de cambios: o inverno vai rematando e a primavera asoma. Na cultura popular galega, este mes está cheo de refráns meteorolóxicos e agrícolas que reflicten a incerteza do clima e a importancia deste período para os labregos.
Que nos din os ditos sobre marzo? Vexamos algúns dos refráns máis coñecidos.
Refráns de marzo
Refráns sobre a predición do tempo
- Cando febreiro non febreirea, marzo marcea.
- Cando marzo abrilea, abril marcea.
- Cando marzo maiea, maio marcea.
- Marzo marzola, trebón e raiola.
- Marzo pardo, abril chuvioso e maio ventoso, fan o ano fermoso.
- O sol de marzo queima as donas no seu pazo.
Refráns sobre animais
- Chuvia en marzo, nin a mexadura dun gato.
- Cobras en marzo, neve en abril.
- En marzo, nin o rabo do gato mollado.
- Entre marzo e abril o cuco ha de vir.
- Marzo marzán, pola mañá cara de rosa e pola tarde cara de can.
Refráns sobre a agricultura
- Quen en marzo non poda a súa viña, perde a vendima.
- Se no marzo ves tronar, arromba cubas e lagar.
- Vendima no regazo, aquel que poda en marzo.
Refráns sobre santos
- Día de san Xosé, primeira anduriña se ve.
- Polo san Matías, marzo ós cinco días.
- Por san Reimundo a anduriña vén do outro mundo.
Os refráns galegos sobre marzo móstrannos a sabedoría dos nosos devanceiros, que aprendían do clima observando a natureza. Moitos destes ditos seguen vixentes hoxe en día, sobre todo no mundo rural.
E ti, coñeces máis refráns? Déixanos un comentario!
5 comentarios en “Os refráns de marzo: sabedoría popular sobre o tempo e o campo”
Xaneiro xabreiro,
febreiro pochanqueiro,
marzo airoso,
abril chuviñoso,
sacan ao maio
florido e fermoso.
Recollido no Courel.
Fermosas verbas as do Courel! Moitas grazas pola achega!
En Arbo din: marzo, marzán, á mañán cara de can, polo mediodía cara de raíña e pola noite corta coma unha fouciña.
Nunca o escoitara! Ben interesante ver todas as variantes deste refrán!
O sol de marzo, queima a dama no pazo.