Non hai mellor forma de aprender unha lingua que usala tamén no lecer. O móbil, que levamos sempre enriba, pode converterse nun aliado para aprender galego mentres nos divertimos. Aquí tes tres apps para xogar e ampliar vocabulario na nosa lingua.
Palabras Galegas
Palabras Galegas é unha aplicación para aprender vocabulario galego a base de tarxetas (o clásico sistema de flashcards, tan eficaz para memorizar). Está pensada para practicar e ampliar o léxico dun xeito sinxelo e visual, ideal tanto para quen está aprendendo galego como para quen quere afianzar palabras que xa coñece.
É gratuíta, está clasificada para todos os públicos (a partir de 3 anos) e non recompila datos dos usuarios. Un proxecto feito por Sergio Couto Catoira.
Apalabrados
O popular xogo de formar palabras sobre un taboleiro (ao estilo Scrabble) ten versión en galego desde hai anos. A adaptación desenvolveuna a empresa Cilenis a partir do Vocabulario Ortográfico da Lingua Galega (VOLGa), así que xogas cun corpus de palabras normativo.
Podes xogar contra un rival concreto (unha persoa coñecida ou un adversario ao chou) ou na modalidade multixogador en liña. Perfecto para picarse cos amigos e, de paso, descubrir palabras novas e afianzar a ortografía sen te dares conta.
Ximnasio Léxico
A app oficial da Real Academia Galega para xogar coas palabras. Baséase no propio Dicionario da RAG e propón retos lingüísticos para poñer a proba (e mellorar) o teu léxico.
Ten dúas modalidades: adestrar, para practicar sen presión, e competir, estruturada en tres niveis de dificultade (inicial, medio e superior), de xeito que sempre atopas un reto á túa medida, saibas moito ou pouco galego. Como vén da RAG, tes a garantía de que todo o vocabulario é normativo.
Se coñeces algunha outra aplicación para aprender galego, compártea nos comentarios!
5 comentarios en “Apps para aprender galego”
Como se pon o apalabrados en galego?
Para xogar en galego, crea unha nova partida e, antes de comezar, abre o menú de idiomas que aparece na parte superior. Selecciona galego e listo!
Eu xogo en liña en Pensatermos (https://pensatermos.amesa.gal/). Non é unha aplicación, pero serve.
Moitas grazas polo artigo!
Grazas pola achega! Si, coñecemos Pensatermos e xa o temos incluído no artigo «Os mellores xogos en galego. Diversión asegurada coa nosa lingua». Déixoche a ligazón por se lle queres botar unha ollada: https://aschavesdalingua.gal/xogos-en-galego/
Gústame.