O galego é unha lingua especialmente rica e precisa para nomear o mundo natural. Herdanza dunha fonda tradición oral, ligada ao territorio e á experiencia cotiá, conserva un amplo vocabulario para describir a neve e todo o que a rodea: como cae, como se move, como se transforma ou que efectos produce.
Neste artigo recollemos unha escolma de palabras galegas para falar da neve con exactitude, distinguindo tipos, fenómenos, accións e formacións para poñer en valor unha riqueza léxica que explica moito máis do clima, isto é, unha maneira de mirar e de vivir o mundo desde as nosas montañas.
Tipos de neve
- Auganeve ou torba: auga de chuvia moi fría que cae mesturada con neve fina.
- Brea, cifra, ciobra, rebelaxe ou xistra: chuvia ou neve acompañada de vento forte.
- Calistro ou corisco: neve miúda ou sarabia, que cae acompañada de vento forte e frío.
- Cebrisca: neve acompañada de vento forte.
- Foula: neve miúda.
- Pavuxada ou puvisada: neve que cae con pouca intensidade.
- Zoldra: neve branda, case derretida.
Fenómenos meteorolóxicos con neve
- Alude ou avalancha: gran masa de neve que se desprende dunha montaña.
- Nevada, nevarada, farrapada ou folerpada: cantidade de neve caída sen interrupción.
- Nevarío: tormenta de neve.
- Trouso: morea de neve que amontoou o vento.
- Zalapastrada: tempestade de neve.
Accións relacionadas coa neve
- Callar: formar a neve unha capa sobre o chan.
- Desnevar: derreterse a neve.
- Faiscar: caer neve ou chuvia miúda.
- Nevar, falopar, farrapear, felepar, folerpar ou mantelear: caer neve.
Formacións de neve e xeo
- Birta, derrota, mallada ou rota: carreiro na neve.
- Cadorno, calistro, carambelo, carambo, caramelo, codorno ou lazo: capa de xeo que se forma na superficie dun líquido cando vai moito frío.
- Folerpa, cerello, faísca, falopa, fargallo, farrapa, farrapo, felepa, foleca, folepa, foupa, galapo ou melga: cada unha das porcións de auga conxelada que caen cando neva.
- Torada: capa máis ou menos grande de neve.
- Xeeira: masa de xeo de gran tamaño que se forma por acumulación de neve.
Outras palabras relacionadas coa neve
boneco
bóla
zorra
luvas
esquís
esborrexer
