O galego é unha lingua chea de riqueza e matices, tamén á hora de falar do tempo. Neste artigo, imos afondar nos verbos que nos axudan a falar do tempo, tanto cronolóxico como atmosférico.
Diferenzas entre o verbo ir, verbo haber e verbo facer en galego
Ir
En galego, para falar do tempo meteorolóxico empregamos o verbo ir.
Exemplos:
Estes días vai moita calor.
Arróupate, que vai frío.
Haber
Para falar dunha cantidade de tempo, emprégase o verbo haber.
Exemplos:
Hai un mes que non a vexo.
Desde hai dous anos non volveu por aquí.
Debe haber tres días que falamos por teléfono.
Facer
Utilízase o verbo facer cando queremos sinalar o número de semanas, meses ou anos do aniversario de algo ou alguén.
Exemplos:
Este luns Xiana fixo 15 anos.
O 6 de xuño meus pais farán 30 anos de casados.
* Ollo! Neste caso non podemos utilizar o verbo cumprir porque en galego non ten o mesmo significado que en castelán. É por iso que *cumpreanos é incorrecto e para celebrar as datas de nacemento utilizamos a palabra aniversario.
