A Semana Santa tamén se vive na cociña. Mentres unhas persoas saen de procesión, outras procesionan directamente á cociña para prepararen lambetadas tradicionais (e algunha máis moderna).
As receitas que traemos hoxe veñen da man de Media Laranxa, un proxecto que mestura agarimo, sabor e identidade. Tres propostas doces para estes días de descanso e sobremesas longas: unha torrada con sabor a café, outra rechea de crema de cacahuete e un roscón de Pascua que fai festa el só.
Roscón de Pascua (versión saudábel)
En Galicia hai unha tradición que non falla en Semana Santa. As madriñas e padriños agasallan unha rosca de Pascua aos seus afillados e afilladas. Pois ben, se es madriña ou padriño, xa non tes escusa. Velaquí tes unha receita caseira e saudábel para quedar como unha raíña ou un rei cos máis cativos da casa.
Ingredientes para o requento:
- 50 g de leite ou bebida vexetal
- 65 g de fariña integral
- 3 g de lévedo seco de panadaría
Ingredientes para a masa:
- o requento
- 225 g de fariña integral
- 3 g de lévedo seco de panadaría
- 1 ovo
- 40 g de leite ou bebida vexetal
- 100 g de pasta de dátiles (elaborada con 65 g de auga + 35 g de dátiles)
- 25 g de aceite de oliva virxe extra
- 15-20 g de auga de azahar (imprescindible para o sabor típico da rosca)
- 1 chisco de sal
- reladura dun limón
- 15 g de glute (opcional, pero necesario se queres facer a versión trenzada)
Ingredientes para decorar:
- Améndoas laminadas
- Arandos vermellos secos ou o que máis che preste
Nota sobre o glute: o glute achega elasticidade á masa. Se queres facer unha rosca trenzada, é obrigatorio. Se a prefires redonda, coma a de toda a vida, podes prescindir del.
Preparación
- Para faceres o requento mestura todos os ingredientes nun bol ata formar unha bóla. Faille un corte en cruz e mergúllaa nun vaso con auga morna. Cando flote, xa está lista para usar como fermento natural.
- Para preparares a masa mestura todos os ingredientes co requento e amasa ata que a masa estea elástica e non se pegue ás mans.
- A seguir, tapa a masa cun pano e déixaa repousar unhas dúas horas ou ata que duplique o seu tamaño. Busca un lugar cálido e sen correntes de aire.
- Despois, amasa de novo e dálle forma de rosca. Lembra facer un burato grande no centro, xa que a masa volverá medrar.
- Por último, coloca as améndoas e os arandos por riba. Prequenta o forno a 200 °C e deixa o forno a esa temperatura os primeiros 5 minutos de cocción. Despois baixa a 180 °C e déixao outros 15-20 minutos. Mete tamén unha bandexa con auga no forno para xerar vapor e evitar que a masa se seque.
- Unha vez fóra do forno, deixa que arrefríe… se es quen de esperar! Bo proveito!
Torradas de café
As torradas son unha desas sobremesas que saben a casa, a festa e a culler lambida de pequeno. Nesta versión con café, a tradición mestúrase cun chisco de enerxía extra.
Ingredientes:
- 200 ml de leite
- 2 ovos
- 3 culleradas de café solúbel
- 1 barra de pan (mellor se está do día anterior)
- 1 cullerada de azucre
Preparación:
- Quenta o leite e disolve nel o café xunto co azucre.
- Corta o pan en rebandas e mergúllaas ben na mestura de leite con café.
- Escoa o exceso e rebózaas en ovo batido.
- Fríteas nunha tixola con aceite quente ata que queden douradas por ambos os lados.
- Retíraas e déixaas repousar sobre papel absorbente para quitar o exceso de aceite.
E xa estaría. Unhas torradas de café que fan que che cheire a Semana Santa ata o salón!
Leite frito (versión saudábel)
O leito frito é unha desas sobremesas que me levan directa á cociña das avoas. Crocante por fóra, tenro por dentro e cun sabor que só aparece unha vez ao ano.
Ingredientes:
- 600 ml de leite ou bebida vexetal
- 1 pau de canela
- Monda dun limón
- 70 g de maicena
- 3 culleradas de mel
- 1 ovo
- Fariña
- Canela en po
Preparación:
- O primeiro paso é infusionarmos o leite. Para iso, poñemos 450 ml de leite a ferver coa canela e coa monda do limón. Cando ferva, apagamos o lume e tapamos durante uns 20 minutos para que colla todos os aromas da canela e do limón.
- Pasado ese tempo, quitamos os aromáticos e no leite que nos sobrou, disolvemos a maicena e o mel. A continuación, vertémolo no leite aromatizado e poñémolo ao lume sen deixar de remexer até que espese.
- Vertemos a crema nunha bandexa e deixamos arrefriar unhas 3-4 horas na neveira até que calle.
- Cortamos o leite callado en rectángulos e rebozámolos primeiro por fariña e despois por ovo. Colocamos os rectángulos sobre unha bandexa de forno e empoamos con canela.
- Enfornamos a 180ºC os rectángulos de leite frito uns 10-15 minutos ou até que estean dourados e listo. Bo proveito!
E ti, que adoitas preparar en Semana Santa? Torradas, roscón ou algo diferente? Déixanos un comentario!
