Hai quen pensa que o zodíaco di moito das persoas: se es máis soñador ou teimudo, se che vai a festa ou prefires quedar na casa… Pero, algunha vez preguntácheste que película galega se identifica contigo segundo o teu signo?
Neste artigo facemos unha viaxe entre estrelas astrolóxicas e estrelas do cinema galego para xogar coas características de cada signo e relacionalas cun filme da nosa terra. Escorpións intensos, virxes analíticos, leóns apaixonados etc., todos tedes unha película que vos representa. Prepárate para descubrir a túa!
Carneiro – As bestas
Impulsivos, directos, sen medo ao conflito. Os carneiro non foxen da loita. Como o protagonista d’As bestas, lánzanse con todo cando cren que teñen a razón, aínda que o ambiente lles sexa hostil. A paixón por defenderen o que é seu, a teimosía e o carácter explosivo fan que esta película represente os carneiro en estado puro.
Touro – Sempre Xonxa
Teimudos, leais e profundamente conectados coa terra. Sempre Xonxa é a historia dunha muller forte, que aguanta estoicamente as inxustizas da vida sen perder a súa esencia. Como os touro, non se rende facilmente, ama con forza e sofre en silencio.
Xemelgos – Cuñados
Enxeñosos, sociables e sempre con retranca. Xemelgos é ese signo que nunca cala, que se mete en leas e que sempre sae ben parado. Como os protagonistas de Cuñados, pensan rápido, falan máis rápido aínda e son expertos en converter un desastre nunha oportunidade.
Cangrexo – A lingua das bolboretas
Emotivos, sensibles e moi conectados coa memoria. A lingua das bolboretas é unha homenaxe á inocencia e ao cariño, mais tamén á perda e á ferida profunda. Unha historia tenra e tráxica, como os propios cangrexo, que viven as emocións con intensidade e non esquecen nunca.
León – Dhogs
Intensos, magnéticos e cunha presenza que non pasa desapercibida. Dhogs é unha película que desafía, impacta e remexe sen pedir desculpas. Como os león, arrisca, xoga co poder, coa mirada e coa escuridade do ego.
Virxe- O Apóstolo
Meticulosos, perfeccionistas e amantes dos detalles. Os virxe son observadores, silenciosos, analizan todo ao milímetro e por iso encaixan perfectamente co ton escuro e coidado d’O Apóstolo. E baixo esa aparente frialdade, agóchase un mundo misterioso, como o dos virxe.
Balanza – Ons
Sensibles e sempre loitando entre o que desexan e o que deben facer. Os balanza son equilibrio, mais tamén dúbida, contradición e paixón contida. Ons é unha historia de sentimentos cruzados, paisaxes fermosas e silencios.
Escorpión – O que arde
Intensos, misteriosos e difíciles de esquecer. O que arde é silencio, contención e forza soterrada. Igual que os escorpión, o filme garda dores antigas, desconfianza e unha conexión profunda coa morte e coa natureza salvaxe. Non precisan moito para estoupar pero cando o fan, arrasan.
Arqueiro – Pradolongo
Libres, aventureiros e cheos de soños. Os arqueiro son amizade verdadeira e vontade de descubrir o mundo. Pradolongo é unha historia de veráns eternos, paseos sen destino e promesas feitas ao sol. Igual que os arqueiro, a película respira idealismo e fai que a vida, malia todo, pague a pena.
Capricornio – O lapis do carpinteiro
Íntegros, comprometidos e con fondo sentido do deber. Os capricornio son leais aos seus principios, mesmo nas peores circunstancias. O lapis do carpinteiro conta unha historia de amor e loita, de ideais que non se dobran e de persoas que seguen adiante a pesar da dor. Como os capricornio, fala da fortaleza interior e da esperanza silenciosa.
Augadeiro – As neves
Enigmáticos, diferentes e sempre fóra do convencional. Os augadeiro sempre teñen a mente aberta ás teorías máis tolas. As Neves mestura misterio e unha contorna inhóspita que atrapa e desconcerta. Como os augadeiro, non segue regras, experimenta, sorprende e deixa no aire preguntas sen resposta.
Peixe – A esmorga
Emotivos, soñadores e autodestrutivos. Os peixe viven entre o idealismo e a traxedia, atrapados entre o que desexan e o que o mundo lles permite ser. A esmorga é unha caída libre, unha longa noite con sentimentos á flor de pel, vínculos confundidos e a procura desesperada de afecto aínda que leve ao abismo.
