As chaves da lingua gaña un dos Premios Mil Primaveras

Publicado: 20/04/2026
Actualizado: 26/04/2026
22 comentarios
Lecer

Temos unha nova que nos fai especial ilusión compartir. As chaves da lingua é un dos catro proxectos galardoados nos VII Premios Mil Primaveras, convocados pola Coordinadora de Traballadores/as de Normalización da Lingua (CTNL).

Que son os Premios Mil Primaveras?

Estes premios creáronse para valorar e visibilizar accións, campañas e proxectos que traballan polo uso e o prestixio do galego. Esta sétima edición recoñeceu catro proxectos con vixencia entre 2022 e 2025.

Por que recoñeceron As chaves da lingua?

O xurado valorou a orixinalidade do proxecto, a súa calidade comunicativa e o bo uso das redes sociais. Tamén destacou a variedade de público ao que se dirixe, tanto galegofalantes que queren mellorar o seu galego como persoas que se queren achegar á lingua por primeira vez.

Alén diso, subliñou o enfoque práctico e próximo, que facilita a aprendizaxe e a interacción, así como a capacidade de tratar temas novidosos e potencialmente virais que manteñen a comunidade sempre pendente dunha nova ensinanza ou curiosidade.

Os outros proxectos premiados

Tamén recibiron o galardón outros tres proxectos: Comando Le, un grupo de activismo cultural da Asociación Espazo Lectura dirixido a adolescentes; O Dépor é da Coruña, unha iniciativa do IES Rafael Dieste da Coruña que traballa a conciencia lingüística a través do fútbol; e Revolta Galega, un programa integral de dinamización lingüística do CPI As Revoltas de Cabana de Bergantiños.

Grazas a todas as persoas que len, comparten e participan n’As Chaves da Lingua. Este recoñecemento é tamén voso.

E aproveito a ocasión para facer unha mención especial a Anxo Sánchez, que deseñou a web e dá forma a todas as aplicacións e ferramentas que hai no blog. Sen el, moitas ideas quedarían só en ideas.

Noemí García Rodríguez

Son profesora de Lingua Galega e Literatura e a creadora do proxecto educativo Dicionario Galego para boomers e de Media Laranxa, ambos os proxectos foron gañadores do premio Mil Primaveras (2022). Alén diso, publiquei diversos traballos na Revista Galega de Filoloxía e son a coautora do Cancioneiro da Ribeira de Piquín.

Últimos artigos publicados

Da canícula ao tosteiro: vocabulario galego para esta vaga de calor

8/07/2026

Vocabulario

Cando chega a calor, o galego ten palabras para todo, isto é, para o sol que queima, para o aire que non corre, para a sede que ...

Os insectos voadores do verán en Galicia: nomes e curiosidades

1/07/2026

Vocabulario

Co verán chegan as noites longas, a calor e tamén os insectos. Algúns son benvidos, outros non tanto, mais todos forman parte da paisaxe galega nesta época ...