Estás nun bar novo, queres compartir o sitio cunha amiga e escribes no WhatsApp: Mándoche a ubicación. A que algunha vez dixeches algo parecido? O problema é que nin *ubicación nin *ubicar existen en galego. Son castelanismos tan estendidos que os usamos sen pensar, pero o galego ten as súas propias palabras para dicir exactamente o mesmo e neste artigo vas descubrilas.
Como se di ubicación en galego?
Por moito que a vexamos escrita en aplicacións, ubicación é unha palabra castelá. As formas correctas en galego para substituíla son:
localización → Comparte a túa localización comigo.
posición → Cal é a túa posición exacta?
situación → A situación do local non aparece ben no mapa.
Entón, como se di ubicar en galego?
O mesmo acontece co verbo ubicar. Trátase dunha forma castelanizada que non pertencen ao sistema léxico do galego. Cando nos referimos a poñer ou instalar algo ou a alguén nun lugar determinado, temos os verbos situar, acomodar, colocar, dispoñer, instalar, localizar e poñer.
Exemplos:
Situaron o novo centro de saúde nas aforas da cidade.
Colócate na entrada e agardo por ti.
Pon a proba a túa localización: xogos de xeografía galega
Se che gusta situar lugares no mapa e coñeces ben o territorio galego, temos dous xogos en galego que non podes perder.
GaliciaGuessr é un quiz de xeografía no cal tes que localizar lugares de Galicia no mapa. A través de imaxes e pistas, tes que demostrar o ben que coñeces o noso territorio.
Logaliza é o xogo para descubrir as comarcas galegas. Se nunca tiveches claro onde remata o Deza e onde comeza a Ulloa, vas aprendelo neste xogo.
E se queres descubrir máis xogos dispoñibles en galego, bótalle unha ollada a este artigo con todos os que fomos recollendo: Xogos en galego.
