Coa elección do novo papa León XIV, moita xente ten a mesma dúbida. Como se pronuncia? León catorce ou León décimo cuarto?
Imos resolver esta cuestión aproveitando a ocasión para falar de números romanos, papas e usos normativos do galego.
Como se pronuncia León XIV?
Nos nomes dos papas, os números romanos lense como ordinais ata o dez, é dicir, dicimos Xoán Paulo primeiro para Xoán Paulo I ou Xoán Paulo segundo para Xoán Paulo II.
Porén, a partir do número once, a cousa cambia. En lugar de seguir coa forma ordinal (como décimo primeiro, décimo segundo…), a forma recomendada en galego é usar números cardinais: once, doce, trece, catorce… Así, Bieito XVI dise Bieito dezaseis e León XIV, León catorce. A forma décimo cuarto, aínda que é comprensible, non é a máis axeitada.
Por tanto, o nome do novo papa escríbese León XIV, pero lése León catorce, con naturalidade e sen complicacións. Así que xa o sabes, se escoitas León décimo cuarto, podes corrixir con confianza (e con retranca, se fai falta).
E se ao falar de números tamén che xorden dúbidas e non sabes se se escribe vintecatro ou vinte e catro, non te preocupes, é unha dúbida común. Neste outro artigo explicamos cando os números se escriben xuntos e cando se escriben separados.
