Na escola todos e todas aprendemos que antes de “r” sempre se pon “b”, como, por exemplo, brazo, cobra, bricolaxe… Porén, en galego temos tres palabras que en lugar de levar o típico “b”, escríbense con “v”. Estas palabras son acivro, ávrego e avreguía.
Acivro
O acivro, tamén chamado acevo ou xardón, é unha árbore silvestre da familia das aquifoláceas que ten as follas brillantes con espiñas nos bordos e o seu froito con forma de baga de cor vermella.
Ávrego
Ávrego ten múltiples significados. Por unha banda, é o nome que recibe o vento do sur ou do suroeste e tamén se denominan así os lóstregos de verán. Por outra banda, tamén se utiliza para designar un cheiro moi desagradable, especialmente o do bravío.
Avreguía
Avreguía utilízase para nomear o estado da atmosfera caracterizado pola presenza do ávrego.
Por que se escriben con “v”?
A palabra acivro procede da forma do latín vulgar *acifŏlum, que remite á do clásico aquifŏlium ‘follas espiñentas’ e, por cuestións etimolóxicas, hoxe en día escribímola con “v”.
