En galego as palabras rematadas en –axe son femininas. Por iso, dicimos a tatuaxe e non *o tatuaxe.
O mesmo lle acontece a outras palabras como a mensaxe, a aterraxe, a curtometraxe, a fichaxe… Mais toda boa regra sempre ten unha excepción. Todas as palabras rematadas en –axe son femininas, agás traxe, paxe e garaxe que son masculinas.
Dito iso, se estás pensando en faceres unha tatuaxe, tes que coñecer os seguintes termos:
Bosquexo
Debuxo no que se deseñan os trazos esenciais dunha obra.
Ignaro
Estilo de tatuaxes caracterizado por liñas simples, tinta negra predominante, palabras e riscadas. A tendencia xurdiu no mundo dos graffitis.
Puxamán
Técnica de tatuar ancestral que se realiza á man cunha agulla e tinta. Era a técnica utilizada antes de que existisen as máquinas de tatuaxe e moitas artistas seguen empregándoa na actualidade.
Cobertura
Técnica para tapar unha tatuaxe en mal estado ou da que xa estamos cansos. Pódese cubrir o debuxo anterior ou crear un novo a partir do anterior.
Vella escola
Estilo de tatuaxe que xurdiu nos barcos e nos circos dos Estados Unidos. Caracterízase por ter liñas grosas e cores primarias e planas con temáticas baseadas en barcos, rosas, anduriñas e caveiras.
