Conducir ben é cousa de práctica e o mesmo pasa ao aprender unha lingua. Por iso, neste artigo coñecerás dez termos relacionados coa condución para manexáreste mellor.
Lombo
A limitación a 30 km/h das cidades fixo que cada vez haxa máis pasos de peóns sobreelevados que tamén reciben coloquialmente o nome de lombos ou lombas.
Sinal
Saltar un STOP está mal e é perigoso, mais é moito máis grave cambiarlle o xénero. En galego a palabra sinal é masculina: o sinal.
Buguina
Perder a paciencia ao volante é doado. Se queremos chamar a atención a outro condutor, podemos facer uso da buguina ou bucina e se o facemos con intensidade, será un buguinazo ou bucinazo.
Chofer
A maioría dos mortais non dispoñemos dun chofer propio, mais se che toca a lotaría e podes permitirte un, lembra que é unha palabra aguda e non grave. Así que ollo á súa pronuncia.
Condutor/a
Todas as palabras relacionadas con condución non teñen os grupos consonánticos -cc- ou -ct- no seu interior. Por iso dicimos condutor, condutora, conduto, conducir, conducente…
Ventá
Se non che gusta a palabra ventá, podes dicir fiestra ou xanela, mais o que non está permitido é dicir *ventanilla.
Beiravía
Ese espazo á beira dunha estrada, xeralmente separado cunha liña branca, reservado para a circulación de peóns ou para deterse os vehículos en caso de necesidade nas autoestradas e autovías chámase beiravía.
Beirarrúa
Se nas estradas temos beiravías, nas cidades adoitamos ter beirarrúas nas marxes para que camiñen os peóns.
Peonil
Se pasades por Lugo, veredes que cada vez están peonalizando máis zonas. Cando unha rúa está destinada a peóns podemos dicir que unha rúa é peonil ou peonal.
Revolver
Por último, quero destacar o uso deste verbo. Para todas aquelas persoas que non sexades da Fonsagrada ou da contorna, sorprenderavos saber que o verbo revolver úsase como sinónimo de virar ou xirar o coche cando queremos darlle a volta.
Cando era pequena e ía á aldea, ao chegar á casa dos meus avós meu pai sempre lle dicía á miña nai “revolve o coche na aira” e ese revolver nada tiña que ver con remexer a comida. Como dato curioso, na miña casa tamén revolvemos a tortilla e non dicimos darlle a volta.
