As tatuaxes están de moda. Cada vez hai máis xente que se anima a levar arte na pel, mais, sabes falar sobre tatuaxes en galego correcto?
Neste artigo íaprenderás unha regra moi útil da nosa lingua e, xa que estamos, aprenderás tamén algúns termos básicos do mundo da tatuaxe. Porque falar galego tamén é levar identidade marcada a lume.
Por que tatuaxe é unha palabra feminina?
En galego as palabras rematadas en –axe son femininas. Por iso, dicimos a tatuaxe e non *o tatuaxe.
O mesmo lle acontece a outras palabras como a mensaxe, a aterraxe, a curtometraxe, a fichaxe… Mais toda boa regra sempre ten unha excepción. Todas as palabras rematadas en –axe son femininas, agás traxe, paxe e garaxe que son masculinas.
Se pensas en facer unha tatuaxe…
Aquí van algúns termos que deberías coñecer se estás a piques de pasar pola agulla.
Agulla
Instrumento finísimo que se utiliza para introducir a tinta baixo a pel durante a tatuaxe. Pode variar en tamaño segundo o tipo de trazado que se queira facer.
Exemplo: O tatuador cambiou a agulla para facer os detalles máis finos do deseño.
Bosquexo
Debuxo no que se deseñan os trazos esenciais dunha obra. É a base sobre a que se constrúe a tatuaxe definitiva.
Exemplo: Antes de tatuar nada, o artista sempre prepara un bosquexo.
Cobertura
Técnica para tapar unha tatuaxe que non nos gusta ou que está en mal estado. Pode cubrir o debuxo anterior ou integralo noutro novo.
Exemplo: Fixen unha cobertura porque a miña tatuaxe anterior xa non me representaba.
Ignaro
Estilo de tatuaxe caracterizado por liñas simples, tinta negra predominante, palabras escritas e riscadas. Xurdiu no mundo dos grafitis e ten un aire rebelde e urbano.
Exemplo: Gústame o estilo ignaro porque parece feito con rabia.
Vella escola
Estilo clásico que naceu en barcos e circos dos Estados Unidos. Caracterízase por liñas grosas, cores planas e temáticas como anduriñas, caveiras, rosas ou barcos.
Exemplo: Quero unha áncora ao estilo vella escola, como as dos mariñeiros.
