Asemade é un conector que non sempre se emprega axeitadamente. É común atopar erros no seu uso, xa que en moitas ocasións se confunde con ademais. Neste artigo explicaremos cal é o significado de asemade, como e cando usalo correctamente en galego e que alternativas existen segundo o contexto.
Cando se utiliza asemade?
Asemade pode utilizarse como adverbio cando ten o significado de ‘ao mesmo tempo’ ou ‘simultaneamente’.
- Non se pode comer e falar asemade.
- Non podes facer os deberes e ver a televisión asemade, pois non te concentras.
Tamén se pode utilizar como conxunción co significado de ‘tan pronto como’.
- Foi o primeiro que vimos asemade entramos.
- Recoñecino asemade o vin.
Cando non se pode utilizar asemade?
É incorrecto empregar asemade como sinónimo de tamén, ademais ou igualmente. Na nosa lingua non ten ese uso.
