En castelán dise que alguén “es un manitas” cando ten habilidade para arranxar cousas, facer chapuzas, reparar, montar mobles ou calquera tarefa que requira un pouco de maña e creatividade coas mans. E en galego, como o dicimos?
Que significa “ser un milmañas”?
Ser un milmañas é unha expresión coloquial que usamos en galego para referirnos a alguén con moita maña, que se defende ben en todo, sobre todo, en cousas prácticas: arranxar unha porta, montar un estante, reparar un trebello ou mesmo facer manualidades.
- O meu pai é un milmañas. Arránxame todo o que se estraga na casa.
- A túa irmá é unha milmañas, mira que ben lle quedou o disfrace feito na casa!
Outras formas de dicilo
Se queres usar adxectivos, tamén podes optar por palabras como:
- mañoso/a → É moi mañoso, sempre atopa o xeito de amañar as cousas.
- apañado/a → Moi apañada ela, fixo o todo o traballo sen axuda.
- habelencioso/a → Un rapaz habelencioso coma poucos.
- habilidoso/a, hábil → Ten unha man habilidosa para a carpintaría.
E chapuza, como se di en galego?
Pois chapuza non é un castelanismo, así que pódelo usar para nomear unha obra mal feita sen problema. Tamén podes dicir chafallada, chafullada, chambonada, trangallada, trapallada ou zarapallada.
- Vaia trapallada fixeches!
- Iso é unha chafallada, tivo que vir outro arranxalo.
- O vídeo quedou ben, pero o son é unha trangallada.
- Contrataron a un que non sabía e fixo unha zarapallada.
