Estamos en época de exames e o vocabulario que usamos no día a día, ás veces, sae en castelán sen dármonos conta. Aquí tes un repaso ás palabras e expresións máis habituais do mundo das probas académicas.
Andar ás minchas
Cando alguén non está prestando atención, podemos dicir que anda ás minchas ou está nos biosbardos.
O galego é especialmente rico nesta expresión e ten moitas variantes: anda ás moscas, andar coa troita, estar na aldea e non ver as casas, estar na horta e non ver as verzas, estar na lúa, estar na parra e non ver as uvas, estar nas patacas, estar no limbo, ir na volta de fóra ou pensar en xalundes.
Ao pé da letra
Cando sabemos algo con todo detalle e precisión, sen deixar nada fóra, dicimos que o sabemos ao pé da letra.
Chapar
O verbo coloquial para memorizar sen entender moito é chapar. E quen se distingue máis pola dedicación que polo talento recibe o nome de chapón/chapona.
Corrector
O líquido corrector ou a cinta correctora é o nome galego do Tipex, que é en realidade unha marca comercial.
De memoria
Aprender algo sen necesidade de consultalo ten moitas formas de dicirse en galego: de memoria, de cabeza, de carreira ou de cor.
Fincar os cóbados
Cando se estuda moito, fincamos os cóbados. Tamén se pode dicir rillar nos libros ou roer nos libros.
Lembrete
O pequeno papel con anotacións que se leva agochado para copiar nun exame podémolo chamar lembrete ou apuntamento oculto.
Quedar en branco
Cando nun exame a mente se queda sen ideas, temos a expresión quedarse en branco.
Sobresaínte
O sobresaínte é a cualificación máxima dun exame. A RAG recoñece tamén a forma sobresaliente. Por riba do sobresaínte estaría a matrícula de honra, unha distinción reservada para os mellores expedientes.
Suspender
Cando non se acada a nota mínima para aprobar, suspendemos. A forma coloquial é cargar. Ex.: Xoel cargou o exame de química.
Tirado/a
Un exame tirado é o que se fai sen esforzo, o que non presenta ningunha dificultade.
Moita sorte a todo o alumnado e a todas as persoas opositoras que estas semanas están a rillas nos libros e nos apuntamentos.
