Begoña Caamaño é a escritora homenaxeada no Día das Letras Galegas 2026. Xornalista, activista e autora de obras como Circe ou o pracer do azul e Morgana en Esmelle, a súa figura combina literatura, compromiso social e defensa do galego dunha forma difícil de separar. Se queres coñecela antes do 17 de maio, aquí tes catro libros para empezar.
Begoña ou o pracer da amizade de Beatriz Maceda
Unha obra pensada para lectores e lectoras a partir dos 11 anos que achega a figura de Begoña Caamaño desde un ángulo pouco habitual nas biografías, o da amizade como valor central. Beatriz Maceda retrata unha muller que fixo da palabra un acto de rebeldía e sororidade e que deixou pegada en todos os que a coñeceron
Os fíos de Begoña de Eva Mejuto
Unha biografía ilustrada por Nuria Díaz que percorre a vida de Caamaño desde a infancia até se converter nunha das voces máis importantes da radio, o activismo e a literatura galega. O fío como metáfora dun legado que, malia romperse cedo, segue tecendo memoria.
Begoña Caamaño de Xosé Manuel Varela e Icía Varela
Con textos de Icía e Xosé Manuel Varela, e ilustracións de Nerea Gómez, este volume percorre a vida, a obra e o activismo de Caamaño desde a infancia ata o seu legado actual. Pensado para as aulas, inclúe mapas do mundo grego e da Materia de Bretaña, redes de personaxes das súas grandes obras e recursos didácticos para traballar valores como a igualdade, a sororidade e a memoria histórica.
Begoña Caamaño. Pequena biografía de Tania Solla
Tania Solla achéganos a Begoña Caamaño nunha biografía ilustrada de 32 páxinas dentro da colección Mulleres Galegas de Lela Edicións. Un formato sinxelo e directo para descubrir a unha muller que cría que o momento era «de cambiar o xogo», non as regras.
Catro formas de achegarse a unha autora que merece ser coñecida non só o 17 de maio, senón todo o ano.
