Cada verán, e xa sen esperar o estío, Galicia arde. Ás veces, a información é dispersa e, a miúdo, quen está a ver o lume directamente non ten onde deixar ese testemuño. Incendios.gal nace para cubrir ese baleiro.
Que é incendios.gal?
É un portal de información aberta e colaborativa sobre incendios forestais en Galicia. Non é un recurso oficial nin substitúe os servizos de emerxencia.
É unha ferramenta cidadá onde calquera persoa pode documentar o que está a ver en tempo real.
O proxecto foi creado por Anxo Sánchez para Orgullo Galego.
Como funciona?
O funcionamento é moi sinxelo. Se estás a ver un incendio ou sabes dalgún, podes entrar en incendios.gal e facer as seguintes accións:
- Subir imaxes de lumes, fume ou estradas cortadas.
- Engadir un testemuño descritivo do que acontece.
- Lanzar un aviso de solidariedade cidadá.
- Xeolocalizar o incendio no mapa.
Para que serve?
A utilidade principal é a de crear un mapa colaborativo en tempo real dos incendios. Isto permite:
- ter unha visión xeral do que está a arder nun momento dado;
- que os veciños e veciñas teñan un espazo para amosar o que está a acontecer en tempo real;
- que calquera persoa interesada poida acceder a testemuños e imaxes directas.
É importante ter en conta que os datos son colaborativos e poden non estar verificados. A información que aparece provén de persoas anónimas e debe interpretarse como tal.
Que non é incendios.gal?
Non é un servizo de emerxencias. Se ves lume, o primeiro que tes que facer é chamar ao 085, o número de atención a emerxencias forestais en Galicia. Despois, se queres documentalo, podes facelo en incendios.gal.
Por que é relevante?
En Galicia, a información sobre incendios adoita estar fragmentada. O verán pasado demostrounos que cando os lumes se multiplican, moitos quedan sen cobertura e sen rastro. Incendios.gal existe para que iso non ocorra. Calquera persoa con móbil pode documentar o que está a ver e deixalo rexistrado nun lugar común, aberto e accesible para toda sociedade.
Se tes veciños, familiares ou amizades en zonas con risco de lume, pásalles a ligazón. Canta máis xente use esta aplicación, máis útil resulta.
