Vir de + infinitivo e acabar de + infinitivo son perífrases aspectuais con valor perfectivo, é dicir, son perífrases que se utilizan para falar de accións xa finalizadas. Nalgúns casos poden utilizarse no mesmo contexto, mais non son sinónimas. Moito ollo!
Acabar de + infinitivo
Acabar de, rematar de ou terminar de + infinitivo utilízanse para falar de acción que remataron. Por exemplo:
Acabo de ler o xornal.
Rematei de facer os deberes agora mesmiño.
Aínda me quedan 20 anos para terminar de pagar a hipoteca.
Vir de + infinitivo
Vir de + infinitivo expresa o remate recente dunha acción mais con idea de movemento. Por exemplo:
Veño de botar as patacas.
Viña de correr catro quilómetros.
Se a acción non leva implícita esa idea de movemento e só expresa o remate da acción, é un galicismo, é dicir, un calco do francés. Trátase dunha construción incorrecta na nosa lingua que debemos evitar e substituír por perífrases de noso:
*Vénse de aprobar o novo protocolo antiincendios → Acábase de aprobar o novo protocolo antiincendios
