Por influencia de linguas próximas ao galego, hai algúns vocábulos que teñen unha acentuación problemática. Neste artigo ensínoche algunhas palabras esdrúxulas que, se cadra, non sabías que o eran.
anódino
Algo anódino, que non *anodino, é algo que non ten importancia, que carece de graza ou interese, mais o que non perde importancia nunca son os acentos.
décatlon
Curiosamente, a pronuncia deste deporte en inglés é grave, igual que acontece no portugués, aguda en español e esdrúxula en galego.
período
Se procuras a palabra período no dicionario da RAG, verás que ten dez acepcións. Debe ser unha das palabras que máis ten.
termóstato
No termóstato podemos cambiar a temperatura ao noso gusto, mais o que non podemos facer é cambiarlle o acento.
xeróglifo
Se che gusta resolver os xeroglíficos do xornal, tes que saber que tamén reciben o nome de xeróglifos.
Outras palabras esdrúxulas
Tamén son esdrúxulas as seguintes palabras: aeróstato, alvéolo, bronquíolo, cardíaco, dínamo, eléctrodo, endócrino, gladíolo, isóbara, óboe, olimpíada, psoríase, rubéola…
Coñeces máis palabras esdrúxulas que adoitamos confundir?
