Para celebrarmos o Día das Letras Galegas, que mellor que animarse a escribir un blog en galego. Por iso, Fala.gal e As chaves da lingua, unímonos para ensinarche a crear o teu propio sitio na rede e así axudar a que a nosa lingua dure mil primaveras máis.
Que debes saber antes de empezar a crear o teu blog?
Non é necesario ser un desenvolvedor ou desenvolvedora de programas ou un deseñador ou deseñadora web para crear o teu propio sitio en Internet. Tampouco se precisa ter grandes dominios de informática. Simplemente, tes que te atrever!
O primeiro que debes coñecer é que os blogs tamén se poden chamar bitácoras e que Internet, aínda que non é un espazo físico, considérase un nome propio, así que temos que escribilo en maiúscula. Seguramente, algunha vez que estiveches trebellando na rede viches iso de “ola amig@s”, pois tes que saber que as gramáticas consideran incorrecto o uso da arroba nestes casos, xa que non constitúe un signo lingüístico nin ten correspondencia oral. Así que cómpre que inicies a túa entrada do blog ou artigo doutro xeito.
Unha vez teñamos claro de que imos falar, é hora de poñerse a escribir. Cando escribimos un texto, temos diferentes formas de destaque que nos axudan a pór en relevo unha palabra ou unha expresión. Deste xeito, podemos utilizar a itálica ou a cursiva, a negra, tamén denominada grosa, ou a versaleta, que, se cadra é máis coñecida como versal ou versalitas. Mais o importante á hora de organizar o artigo é darlle o formato correcto para despois poder indexar un índice de contidos.
En canto ao deseño, podes utilizar padróns ou modelos preestablecidos e anexar fotos e vídeos. Lembra que tamén é interesante poñer ligazóns doutros artigos e tampouco é mala idea poñer un botón para facer buscas ou procuras dentro do teu sitio web para atopar máis rápido o que se está a buscar.
Se tes en conta todo isto, non vas ter problema en ser o mellor blogueiro ou blogueira!
Como crear o teu blog?
Agora que xa coñeces as chaves para iniciar a túa propia bitácora, cóntoche como podes crear o teu propio blog de balde.
En fala.gal, podes crear o teu propio blog desde cero e co dominio .gal de forma sinxela e gratuíta. Podes escoller o nome que máis che guste, crear as túas páxinas seguindo o modelo que escollas, subir as túas fotos e escribir un blog sobre o que ti queiras. Ademais, para aquelas persoas que non están afeitas ás bitácoras, Fala conta con guías e titoriais que che axudarán no proceso.
Se queres botarlle unha ollada aos blogs xa creados e descubrir cousas interesantes que fai a xente na rede, podes ver a lista de sitios aquí.
