A linguaxe non é só unha ferramenta de comunicación, tamén é un reflexo da sociedade en que vivimos. O galego, como calquera lingua, foi moldeada por séculos de prácticas e estruturas que, en moitos casos, invisibilizaron a certos grupos, especialmente ás mulleres. Por iso, aquí che deixo unhas pautas prácticas para evitares o sexismo na linguaxe e promoveres unha comunicación máis inclusiva. Ten en conta que as tres primeiras opcións non teñen ningunha marca de xénero polo que se consideran as máis recomendables.
Substantivos colectivos
Utiliza substantivos colectivos como alumnado, cidadanía, profesorado, funcionariado, mocidade, xuventude, xente, veciñanza, poboación…
❌ Acudiron todos os veciños a apagar o lume.
✔️ Acudiu toda a veciñanza a apagar o lume.
Perífrases nominais
Usa perífrases nominais como a persoa interesada, o cadro de persoal, o cadro de xogadores, o persoal de limpeza…
❌ Os interesados enviarán un correo.
✔️ A persoa interesada enviará un correo.
Pronomes
Podes utilizar pronomes sen marca de xénero como por exemplo: cada contribuínte, calquera artista, quen aspirar a……
❌ O que queira participar que se apunte.
✔️ Quen queira participar que se apunte.
Desdobramento
Outra opción válida é o desdobramento dos substantivos.
❌ Os alumnos de Galego
✔️ Os alumnos e as alumnas de Galego
Barra diagonal
Tamén existe a posibilidade de utilizar a barra diagonal.
❌ Os alumnos de Galego
✔️ Os/as alumnos/as de Galego
Ollo!
O uso do arroba non se considera correcto, xa que non é un signo lingüístico. Polo tanto, escribir cousas como “Ola a tod@s” é incorrecto en galego.
Por que é importante utilizar a linguaxe inclusiva ou a linguaxe non sexista?
Evitar a linguaxe sexista no galego non é complicado, mais require consciencia e vontade. Pequenas mudanzas na nosa forma de falar e escribir poden ter un grande impacto, promovendo unha sociedade máis igualitaria e respectuosa. A túa linguaxe pode ser unha ferramenta de inclusión. Cada palabra conta!
