Os insultos en galego máis auténticos (e como usalos sen ofender demasiado)

O galego é unha lingua chea de matices e expresións únicas e os insultos non son unha excepción. Moitos teñen raíces antigas, outros son adaptacións e algúns reflicten perfectamente a idiosincrasia galega.

Pero ollo! Non todos os insultos son ofensivos. Moitas destas palabras úsanse con toques de humor e ironía, sen intención de facer dano. Así que, se queres saber como chamar de todo a alguén sen que se ofenda demasiado, este artigo é para ti.

Os insultos en galego que tes que coñecer

Aquí tes unha selección de insultos ben galegos, organizados segundo o seu significado.

Para quen ten pouca intelixencia

Para esas persoas que parecen ter poucas luces:

apailonado, baballán, baballas, babanca, babarro, babeco, babiolo, babión, baloco, badulaque, bobo, boubexo, citote, chaíñas, cretino, estúpido, fato, idiota, imbécil, lapabroas, lapadoura, mamalón, maroubo, miñaxoia, paduán, paifoco, pailaroco, paio, paiolo, palabea, palerma, palimoco, pamparulo, pánfilo, panoco, panoio, papafilloas, papahostias, papainas, papalastrán, papallón, papaleisón, papamoscas, papán, paparón, paparote, papaxoubas, papoio, papón, paroxa, parvallán, parviolo, parvo, pasmón, paspán, paxaretas, tarouco…

Para quen engana con habilidade, pero sen malicia

Non todo son insultos agresivos, tamén hai palabras para referirse a esas persoas que sempre teñen unha artimaña preparada:

galopín, pillabán, pillo, tunante, tuno...

Para quen non lle gusta traballar

Aquí tes uns cantos insultos para quen sempre busca o camiño máis cómodo e ten desculpas para non facer nada:

folgazán, galbán, lacazán, langrán, preguiceiro....

Para quen se queixa por todo

Todos coñecemos a alguén que non deixa de lamentarse, exaxerar ou facer drama por calquera cousa. Estes insultos son perfectos para eles:

choricas, choromicas, choromiqueiro, chorón, criqueiro, figureiro, mecoso, melindroso, mexericas, mexeriqueiro, netorreiro, nifrón, nifroso...

Para quen cambia de ideas e de amigos segundo lle convén

A lealdade é un valor importante, mais hai quen sempre está disposto a cambiar de chaqueta segundo como veña o vento:

bailanacriba, chaqueteiro, virachaquetas...

Para quen fala máis da conta

Se coñeces alguén que non cala nin debaixo da auga ou que sempre anda revelando segredos, aquí tes algúns termos perfectos:

larapeteiro, lareto...

Para quen carece de xenerosidade

Porque en Galicia sabemos que compartir é vivir, mais sempre hai quen lle custa máis soltar a carteira:

agarrado, amarrado, apertado, atado, avarento, avaro, cativo, cotroso, cutre, mesquiño, miserento, vil...

Para quen non coida a hixene ou é descoidada

Se hai algo que sempre chama a atención é cando alguén non se preocupa moito pola súa limpeza ou aspecto. En galego temos varias palabras para describir esas persoas que parecen vivir sempre no medio dun furacán:

adán, baldreo, badanas, baldroeiro, baldrogas, bandallo, fargallón, pastrán, pelandrán, torgallo, zalapastrán, zampallán…

Para quen sempre ten medo

Se sabes de alguén que adoita sentir medo e se asusta facilmente ou que carece de valor para enfrontarse aos perigos, olla estes adxectivos:

cagado, cagainas, cagalleiro, cagán, cagarolas, caguelo, caguiñas, cocainas, covarde…

E ti, coñecías todos estes insultos? Sabes algún máis? Déixao nos comentarios!