Unha das cousas máis difíciles á hora de aprender galego é saber colocar os pronomes correctamente. Logo de aprender cando utilizar os pronomes te e o che, neste artigo ensínoche as regras fundamentais para saber se o pronome átono vai diante ou detrás do verbo.
Cando vai detrás o pronome?
A colocación habitual do pronome é que vaia detrás do verbo. Por exemplo:
As meigas…Habelas, hainas!
Tareixa mercoume unha saia. Tívena que devolver porque non era do meu talle.
Cando vai diante o pronome?
Como toda boa regra, sempre hai excepcións. A seguir, móstroche os casos onde o pronome debe ir antes do verbo.
Con enunciados negativos
Cando unha frase é negativa, isto é, cando hai un non, nada, nin, ninguén, ningún ou nunca o pronome vai antes.
Non me quixo contar a verdade.
Ninguén a viu.
Nada lle parece ben.
Con enunciados enfáticos
O demo te coma!
Mal raio me parta!
Cos pronomes relativos, interrogativos e exclamativos
A idea que nos propuxeches é moi boa.
Onde o viches?
Non sabes como lle gustou o agasallo!
Cos seguintes pronomes
Cos pronomes algo, alguén, ambos, bastante, calquera, mesmo, pouco, propio e todo.
Algo me dixo sobre o tema.
Todo o mundo a escoitou berrar desde o balcón.
Calquera lles di que están errados.
Cos seguintes adverbios
Coa maioría dos adverbios o pronome vai antes do verbo. Velaquí algúns: acaso, aínda, algures, até, axiña, bastante, ben, case, demasiado, enseguida, máis, mal, mellor, quizais, seica, sempre etc. O mesmo acontece cos adverbios rematados en -mente.
Bastante lle axudei para o que fixo.
Seica che compraron un coche polo aniversario.
Sempre o vexo lendo o xornal.
Soamente o viu aquela vez.
Coas seguintes conxuncións
Coas conxuncións e locucións conxuntivas que, se, porque, xa que, ou etc.
Dixo que o chamases despois das tres.
Se o fixese ben, seguro que gañaba o premio.
